ربّانه بمضيفه

ربّانه بمضيفه = حيدر ما نعيفه
عاهدنه محمد = اللهم إشهد
حيدر ما نعيفه
*******
ربينه ابكنف حماي الحميه = واحنه ابعالم الذر
كـــل ذرّه بدمانه حيدريّه = تلهج بسم حيدر
بهذا اليوم شنقدّم هديّه = إلك ياعود شبّر
وفه العهدك يكرار = جِنَحْ كلبي ورفيفه
يسجد على المرقد = اللهم إشهد
حيدر ما نعيفه
*******
مانــوفيك يالأبطــح يالأنــزع = لـــو ضحينه بالروح
ومن اتشوف عين المحب تدمع = وراها امحسّبه جروح
الخيانه باجر مــن الربع تطلع = ونتانة غيضها تفوح
وتتكشّف يبو حسين = الناس المو عفيفه
ويبيِّن المرتد = اللهم اشهد
حيدر ما نعيفه
******
رغماً عالعده ياداحي الباب = بالذر واحنه نهتف
نعم كلناها من جنّه بالأصلاب = بأذن الدهر تعصف
يمنصّب أمير ابنص الكتاب = رغماً عالتحرِّف
ابوجهم صارت اسيوف = الاقلام الشريفه
يصيح القلم محتد = اللهم اشهد

حيدر مانعيفه
*******
صرخ صوت العداله وصحنه ويّاه = خير العمل انته
وسيفك صار للحق قطب رحّاه = وعالظالم فرضته
لكل مظلوم صدرك كهف آواه = حِماه من احتضنته
كل اللي إله حيف = فقارك اخذ حيفه
وصاح الحق الي رد = اللهم اشهد
حيدر ما نعيفه
*******
القوي عندك ضعيف اوماتهابه = ياهو اللي يكحمك
امتون الهادي تشهد والصحابه = من يكدر يضمّك
تلوذ ابغرّتك كل المهابه = يشهد بيها خصمك
واليوكف ابوجهك = بيده انثلم سيفه
وعالهامات تصعد = اللهم اشهد
حيدر ما نعيفه
*******
نور انته باءرضنه ومن سمانه = ابهالنور اهتدينه
نكص ائيده الذي يسرق ضوانه = ونطفي ضوه عينه
من عطرك تعطّر كل هوانه = وغيرك ما هوينه
ونكشّف عيوبه = الئيده مو نظيفه
من عدنه مينعد = اللهم اشهد
حيدر ما نعيفه
*******

وفقك الله ورعاك سيدنا